ХУД-ийн Прокурорын газраас 474 ялтны 494,443,000 төгрөгийн торгох ялыг бүрэн төлүүлжээ

-Гэмт хэргээс урьдчилан сэргийлэх зорилгоор үр дүнтэй ажлуудыг зохион байгууллаа-

Прокурорын байгууллагаас 2019 онд дэвшүүлсэн зорилтыг хэрэгжүүлэх ажлын хүрээнд Хан-Уул дүүргийн прокурорын газар нь Хүрээлэн байгаа орчны эсрэг гэмт хэрэг, зөрчлөөс урьдчилан сэргийлэх чиглэлээр  зөвлөгөөн зохион байгуулж, “Зөвлөмж” гаргаж ажиллажээ. Зөвлөмжийн хэрэгжилтийг хангуулах зорилгоор Хан-Уул дүүрэг дэх Мэргэжлийн хяналтын хэлтэс, Нийслэлийн мэргэжлийн хяналтын газрын эрх бүхий албан тушаалтнуудыг оролцуулан Туул голын сав орчимд буй суурьшлын бүс, барилга угсралт явуулж буй хуулийн этгээдийн үйл ажиллагаатай газар дээр нь  танилцаж, цаашид авч хэрэгжүүлэх арга хэмжээний талаар харилцан санал солилцсон байна.

Мөн “Мансуурах” зөрчлийн гаралт хамгийн их бүртгэгдсэн 3,15 дугаар хорооны Засаг дарга нарт “Прокурорын мэдэгдэл”, дүүргийн Гэмт хэргээс урьдчилан сэргийлэх ажлыг зохицуулах салбар зөвлөл болон Дүүргийн Засаг даргад танилцуулга тус тус хүргүүлж, мансуурах зөрчил их үйлдэгдсэн тус дүүргийн 15 дугаар хорооны нутаг дэвсгэрт байрлах “Минт” шөнийн цэнгээний клубт очиж яриа, таниулга хийсэн байна.

Прокурор шүүхэд төрийг төлөөлөх ажлын аргачилсан зааварт заасны дагуу хүлээн авсан шүүхийн шийдвэртэй хэрэгт хяналт тавьсан прокуророос гадна шүүхэд төрийг төлөөлөх ахлах прокурор нь давхар танилцан, улсын яллагчийн байр суурийг сонсож, эсэргүүцэл бичих эсэхийг шийдвэрлэн ажиллаж байна.

“Зөрчлийн хэрэг бүртгэлтийн ажиллагаанд хяналт тавих хяналтын чиглэлээр”

Тайлангийн хугацаанд тус прокурорын газраас хяналтын харьяа зөрчил шалган шийдвэрлэх эрх бүхий байгууллага, албан тушаалтны судалгааг 2 удаа шинэчлэн гаргуулан авч, прокурорын хяналтанд бүрэн хамруулан ажилласан байна.

2018 онд нийт 135151 гомдол, мэдээллийг хүлээн авч шалгаснаас 135117 буюу 99.9 хувийг шийдвэрлэсэн бол энэ онд 133165 гомдол, мэдээллийг хүлээн авч шалгаснаас 133131 буюу 99.9 хувийг шийдвэрлэсэн нь хүлээн авсан гомдол мэдээлэл 1952 буюу 1.5 хувиар буурсан, шийдвэрлэлт нь өмнөх оны түвшинд байна.

Шийтгэл оногдуулсан хэргийн тоо 1170 болж 24.7 хувиар, үүнээс шүүхэд санал гаргасан хэрэг 351-ээр буюу 34.8 хувиар тус тус өссөн дүнтэй байна. Зөрчлийг шалгах ажиллагааны явцад учирсан 98.946.774 төгрөгийн хохирлыг барагдуулж, хохирсон иргэний эрх, хууль ёсны ашиг сонирхол зөрчигдөх, хөндөгдөхгүй байхад анхаарч ажиллажээ.

Хэрэг бүртгэх, мөрдөн байцаах ажиллагаанд хяналт тавих чиглэлээр:

Хан-Уул дүүргийн прокурорын газраас гэмт хэргийн шинжтэй 4444 гомдол, мэдээлэлд хяналт тавьж ажилласныг өмнөх оны мөн үетэй харьцуулахад 344 буюу 7.1 хувиар буурсан.

Хэрэг бүртгэлтийн ажиллагаа явуулсан нийт 5351 хэргээс гэмт хэрэг үйлдсэн этгээдийг илрүүлэх боломжтой, яллагдагчаар татах хүн, хуулийн этгээд нь тодорхой хэрэг бүртгэлтийн хэргийн 85.8 хувьд нь эрүүгийн хэрэг үүсгэж, яллагдагчаар татан, мөрдөн байцаалтын ажиллагаа явуулжээ.

 Прокурорын даалгавар 4137 хэрэгт бичсэнээс хэрэг бүртгэлт мөрдөн байцаалтын ажиллагааны явцад 3621 даалгавар бичсэн нь нийт даалгаврын 87,5 хувь болж байгаа нь өмнөх оныхоос 33 хувиар өссөн байна.

               “Ял эдлүүлэх  ажиллагаанд хяналт тавих ажлын чиглэлээр”

2019  онд нийт 713 ялтан, хяналт тавьж ажилласан нь өмнөх оны мөн үетэй харьцуулахад 172 оор буюу 24.1 хувиар, тэнсэх албадлагын арга хэмжээ авсан  этгээдэд 479  этгээдэд хяналт тавьж ажилласан нь 157-оор  51.6 хувиар  тус тус өссөн бөгөөд  хяналтанд бүрэн авч  тасралтгүй хэрэгжүүлэн ажиллажээ.

Торгох ялаар шийтгүүлсэн ялтан 161-ээр буюу 29.8 хувиар өссөн бөгөөд торгох ялаар шийтгүүлсэн  474 ялтны 494,443,000 төгрөгийн торгох  ял нь бүрэн биелэгдсэн байна.

Нийтэд тустай ажил хийлгэх ялаар шийтгүүлсэн 85 ялтанд  хяналт  тавьж ажилласан бөгөөд  ялаас зайлсхийсэн 10 ялтны ялыг солиулсан  бол эрх хасах ялаар шийтгүүлсэн 89 ялтанд хяналт тавьж ажилласан ба эрх хасах ялын хэрэгжилтийг  хоёр удаа   шалгахад хуулийн хэрэгжилт зохиох түвшинд хэрэгжиж байгаа аж.

“Гэмт хэрэг зөрчлөөс урьдчилан сэргийлэх чиглэлээр”

Дүүргийн прокурорын газраас гэмт хэрэг зөрчлийн шалтгаан нөхцлийг арилгуулахаар 180 мэдэгдэл бичиж, хууль тогтоомжийн хэрэгжилтийг дангаараа болон бусад байгууллагатай хамтран 18 удаа шалгаж, судалгаа 6, зөвлөгөөн, хэлэлцүүлэг 5, хууль сурталчлах ажлыг 57 удаа байна. Гэмт хэрэг, зөрчлөөс урьдчилан сэргийлэх зорилгоор 5600 иргэнд 26 удаа яриа таниулга хийсэн байна.