О.Баасанхүү гишүүн өрөөнөөсөө хөөгдөж,коридорт конторлох болов

УИХ-ын гишүүн О.Баасанхүүг ажлын өрөөнөөс нь хөөж байгааг тэрээр сэтгүүлчдэд мэдэгдлээ. УИХ-ын Тамгын газраас түүнийг өрөөгөө даруй суллаж өгөхийг шаардсан албан бичгийг өнөөдөр ирүүлсэн байна.

Уг шардлагыг УИХ-ын гишүүн О.Баасанхүү шударга биш байна хэмээн цухалдаж байна. Сүүлийн үед УИХ-аар хэлэлцэж байгаа асуудлыг эсэргүүцсэнийх нь төлөө түүний эсрэг хийж байгаа алхам гэж тэрээр тайлбарлав. Тэрбээр хамгийн сүүлд Хөрөнгө оруулалтын банкны тухай хуулийн төслийг эсэргүүцсэнээ сэтгүүлчдэд ярив.

Яагаад эсэргүүцсэний учир нь, хөрөнгө оруулах нэрээр Хятадын банк орж ирнэ, түүгээр дамжиж, төмөр зам, Тавантолгойн орд зэрэг гол, гол стратегийн ордуудыг барьцаалах эрсдэл үүсэх тул хуулийн төслийг батлах нь аюултай гэж О.Баасанхүү гишүүн байр сууриа илэрхийлжээ. Харин ийм байр суурь барьсных нь төлөө УИХ-ын дэд дарга Ц.Нямдорж болон Ч.Хүрэлбаатар нарын гишүүд түүнийг гүтгэж, дайрч давшилсан аж. Тэрээр “яагаад заавал намайг өрөө сулла гэсэн нь учиртай” гээд тайлбарлахдаа “Парламентад УИХ дахь МАН-ын бүлгийн 65 гишүүн байгаа, тэднээс нэг нь өрөөгөө суллаад өгч болно. Үгүй бол тэднийхээ нэг өрөөнд нь намайг оруулж болно. Ийм байдалд хүргэсний цаад санаа нь О.Баасанхүү улс төрийн акц биш өрөөний хэрүүл хийдэг гэсэн ойлголт төрүүлэх гэж байна гэв. Тэр ч байтугай эрхэм гишүүнийг МАН-д элсэн орох гэж байна гэсэн цуу яриа хүртэл гаргажээ.

Энэ цуурхлыг тэрээр үгүйсгэж, “битгий горьд гэж би хэлнэ” гэв. “Хэрвээ эд нар намайг ажлын өрөөнөөс гаргаж байгаа бол би коридорт гаръя, гэхдээ би Монголыг өрөнд оруулж байгаатай тэмцэх болно” гэж хатуухан хэллээ. Түүний ярьсныг анзаарвал, МАН-ынхан хүний олноор далимдуулан цөөнхөд шахалт үзүүлээд байгаа юм биш биз. Монгол Улсын төлөө гэсэн үзэл бодол илэрхийлсний төлөө ангийнхаа хэн нэгнийг “буланд шахаж” болох уу гэж бодогдов. Иймэрхүү үзэгдэл олонхийг муухай харагдуулж мэднэ. Сэтгүүлчдийн асуултад тэрээр хариулт өглөө.

-Таны суллаж өг гэсэн өрөө намын бүлгийн дарга нар байх ёстой өрөө юм биш үү. Өмнө нь та УИХ дахь МАХН-МҮАН-ын Шударга ёс эвслийн бүлгийн даргаар томилогдохдоо одоогийн өрөөнд орсон. Шинэ парламент бүрдэхэд өрөөгөө хүлээлгэж өгөөгүй юм биш үү?

-Төрийн ордонд тэр сууна, энэ суухгүй гэдэг өрөө байдаггүй. Өрөөндөө жил шахам болох гэж байна. Чуулганы үйл ажиллагаа хэвийн явж байхад ингэж хүндрүүлж байгаа нь таалагдахгүй байна.

-Таныг өмнө нь өрөөгөө суллаж өг гэдэг шаардлага тавьж байсан гэсэн?

-Бичгээр ганцхан энэ шаардлага л ирсэн. Хэрвээ ийм байдалтай байвал МАН-ын бүлгийн даргын өрөөнийх нь үүдэнд суусан ч болно. Нарийн яривал УИХ-ын даргын өрөө ч гэж байхгүй. Ганц гишүүнийг хэн ч биш болго гээд явуулаад байгаа зүйл шүү дээ гэв.